Sut y Gall Helpu Ysgolion i Weithredu’r Safonau Proffesiynol

Cefndir: Rhaglen Arweinyddiaeth XLence

Mae’r Fframwaith Adolygu Safonau XLence a’r Offeryn Dysgu Proffesiynol cysylltiedig wedi’u cynllunio i helpu staff i werthuso, cofnodi a datblygu eu harfer yn erbyn y Safonau Proffesiynol ar gyfer Addysgu ac Arweinyddiaeth yng Nghymru.

O fis Medi 2019 cychwynnodd ein saith ysgol llysgennad raglen blwyddyn o hyd, gan ddefnyddio’r fframwaith a’r system, a ddyluniwyd i wella arweinyddiaeth ac addysgu. Nod y rhaglen yw:

• ehangu gwybodaeth a dealltwriaeth o’r Safonau Proffesiynol;
• gwella sgiliau a chymwyseddau arweinwyr yn erbyn elfennau o fewn y Safonau;
• datblygu a chefnogi dysgu sy’n seiliedig ar ymchwil o fewn ac ar draws ysgolion;
• cyfrannu at wella ysgolion a datblygiad yr ysgolion fel sefydliadau dysgu.

Mynychodd pob ysgol a wahoddwyd i fod yn llysgenhadon gyfarfod cychwynnol ym mis Mai 2019, gan amlinellu’r Rhaglen Arweinyddiaeth arfaethedig, a dilynwyd hyn gan gyfarfod manwl ym mis Medi gydag ysgolion yn cytuno ar y rhaglen derfynol, gan gynnwys camau gweithredu a llinellau amser penodol.

Ar ôl hyn, cychwynnodd yr ysgolion ar y rhaglen, a oedd yn golygu defnyddio’r fframwaith a’r system ar-lein. Gadawyd yr union fethodoleg ar gyfer gweithredu i’r ysgolion, ac roeddent yn defnyddio gwahanol ddulliau yn ôl y cyd-destun.